Ոստիկանությունում կայացավ Skype-ի միջոցով հերթական ուղիղ կապը արտերկրի մեր հայրենակիցների հետ (ՏԵՍԱՆՅՈՒԹ)

Փետրվարի 17-ին ոստիկանության անձնագրային և վիզաների վարչության պետի տեղակալ, ոստիկանության փոխգնդապետ Մնացական Բիչախչյանը սկայպի միջոցով հերթական անգամ պատասխանեց արտերկրի մեր հայրենակիցների հարցերին:
Օտարերկրյա պետությունում գտնվող քաղաքացին հայտնելով, որ ՀՀ նախագահի հրամանգրով իրեն շնորհվել է ՀՀ քաղաքացիություն, ցանկանում էր տեղեկանալ, թե արդյոք կարո՞ղ է ՀՀ քաղաքացու առաջին անձնագիրը ստանալ օտարերկրյա պետությունում և կա՞, արդյոք, ժամկետային սահմանափակում քաղաքացիությունը շնորհվելուց հետո անձնագիր ստանալու համար: Նրան պարզաբանվել է, որ ՀՀ կառավարության որոշմամբ սահմանված է այն պետությունների ցանկը, որոնց քաղաքացիները ստանալով ՀՀ քաղաքացիություն՝ առաջին անգամ անձնագիր կարող են ստանալ նաև օտարերկրյա պետություններում գտնվող դիվանագիտական ծառայությունից : Դրանք են՝ Լիբանանի Հանրապետությունը, Սիրիայի Արաբական Հանրապետությունը և Իրաքի Հանրապետությունը: Մյուս բոլոր դեպքերում՝ անձը ՀՀ քաղաքացու առաջին անձնագիրը կարող է ստանալ միայն Հայաստանի Հանրապետությունում: Ինչ վերաբերում է ժամկետային սահմանափակմանը, ապա մտահոգվելու կարիք չկա, ՀՀ Նախագահի հրամանագրով ՀՀ քաղաքացիություն շնորհելուց հետո անձը կարող է ցանկացած ժամանակ դիմել անձնագիր ստանալու համար:
Օտարերկրյա պետությունում գտնվող մեկ այլ քաղաքացի տեղեկացրել է, որ ունի նաև Հայաստանի Հանրապետության քաղաքացիություն և ցանկանում էր տեղեկանալ, թե Հայաստանում գտնվելու դեպքում արդյո՞ք իր վրա տարածվում են օտարերկրյա քաղաքացիներին վերաբերող պարտականությունները՝ բնակվելու ժամկետային սահմանափակման, կացության կարգավիճակ ստանալու առումով: Նրան տեղեկացվել է, որ Հայաստանի Հանրապետության երկքաղաքացին Հայաստանի Հանրապետության համար ճանաչվում է միայն որպես Հայաստանի Հանրապետության քաղաքացի և նման դեպքերում որևէ սահմանափակում չի կարող կիրառվել:
Հայաստանում գտնվող քաղաքացին էլ տեղեկացնելով, որ երեխայի հայրը գտնվում է օտարերկյա պետությունում, մտահոգություն էր հայտնել, որ նա համաձայնություն չի տալիս երեխային ՀՀ քաղաքացու անձնագիր տալու համար, ինչը իրեն կանգնեցրել էր դժվարին կացության առաջ: Ոստիկանության ներկայացուցիչն անմիջապես կապ է հաստատել տվյալ տարածքային անձնագրային ծառայության ղեկավարի հետ և պայմանավորվածություն է ձեռք բերվել օրենքով սահմանված կարգով օժանդակել քաղաքացուն և հարցին տալ արագ լուծում:

Սկայպի միջոցով հաջորդ ուղիղ կապը տեղի կունենա փետրվարի 24-ին:

ՀՀ ոստիկանության սկայպի հասցեն` Armenian Police