Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)
![Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ) Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)](/timthumb?src=/resources/police/img/news/big/1466518762,5187.jpeg&q=75&w=780&wm=1)
Հունիսի 21-ին մեր հայրենակիցները Skype-ի միջոցով իրենց հետաքրքրող հարցերն ուղղեցին ոստիկանության անձնագրային և վիզաների վարչության պետ Մնացական Բիչախչյանին:
Զանգահարել է օտարերկյա պետությունում բնակվող քաղաքացին և հայտնել, որ 2005 թվականին ստացել է Հայաստանի քաղաքացու անձնագիր, որի ժամկետը լրացել է 2015 թվականին: Ունի նաև տվյալ պետության կողմից տրված բնակության իրավունքը հավաստող փաստաթուղթ, որը վավերական է մինչև 2020 թվականը: Օրինական կարգով բնակվելու և որոշ գործարքներ կատարելու համար նշված փաստաթուղթը բավարար չէ, ուստի ցանկանում է տեղեկանալ, թե կարո՞ղ է դիմել Հայաստանի քաղաքացու անձնագրի ժամկետը երկարաձգելու համար: Նրան տեղեկացվել է, որ հին նմուշի անձնագրի վավերականության ժամկետը կարող է մեկ անգամ երկարաձգվել 5 տարով, բայց ոչ ավել քան անձնագրի ընդհանուր 15 տարյա վավերականության ժամկետով: Նշված խնդրով քաղաքացին կարող է դիմել օտարերկյա պետությունում գտնվող հյուպատողական ծառայություն կամ լիազորված անձի միջոցով՝ անձնագրային և վիզաների վարչություն:
Օտարերկյա պետությունից զանգահարած մեկ այլ քաղաքացի էլ հայտնել է, որ ինքը և ամուսինը այլ պետության քաղաքացիության հիմքով ստացել են Հայաստանի քաղաքացիություն՝ ՀՀ նախագահի հրամանգրով: Իրենց երեխայի համար չեն դիմել և չեն ստացել Հայաստանի քաղաքացու անձնագիր և ցանկանում է տեղեկանալ, թե արդյո՞ք երեխան համարվում է Հայաստանի քաղաքացի: Զանգահարողին պարզաբանվել է, որ եթե երկու ծնողներն այլ պետության քաղաքացիության հիմքով ստացել են Հայաստանի քաղաքացիություն, ապա երեխան Հայաստանի քաղաքացիություն է ձեռք բերում Հայաստանի քաղաքացու անձնագիր ստանալու հիմքով: Քանի դեռ նա չի ստացել անձնագիր, ապա Հայաստանի քաղաքացի չի հանդիսանում:
Հաջորդ ուղիղ կապը տեղի կունենա հունիսի 28-ին՝ Երեւանի ժամանակով ժամը 11-ից 13-ը:
ՀՀ ոստիկանության սկայպի հասցեն` Armenian Police
Հարցեր կարելի է ուղարկել նաև press@police.am, dimum@police.am էլեկտրոնային հասցեներին: