Այսօր skype-ի միջոցով կայացավ հերթական ուղիղ կապը արտերկրի մեր հայրենակիցների հետ (ՏԵՍԱՆՅՈՒԹ)
23.12.2014 15:17
Համակարգի լրատու
![Այսօր skype-ի միջոցով կայացավ հերթական ուղիղ կապը արտերկրի մեր հայրենակիցների հետ (ՏԵՍԱՆՅՈՒԹ) Այսօր skype-ի միջոցով կայացավ հերթական ուղիղ կապը արտերկրի մեր հայրենակիցների հետ (ՏԵՍԱՆՅՈՒԹ)](/timthumb?src=/resources/police/img/news/big/1419333984,74.jpeg&q=75&w=780&wm=1)
Դեկտեմբերի 23-ին ոստիկանության անձնագրային և վիզաների վարչության պետի տեղակալ, ոստիկանության փոխգնդապետ Մնացական Բիչախչյանը սկայպի միջոցով հերթական անգամ պատասխանեց արտերկրի մեր հայրենակիցների հարցերին:
Օտարերկրյա պետությունում գտնվող ՀՀ քաղաքացին հայտնում էր, որ անձնագիրը կորցրել է, և նրան հետաքրքրում էր, թե օտարերկրյա պետությունում առավել սեղմ ժամկետում նոր անձնագիր ստանալու վճարովի ծառայություն գործո՞ւմ է, թե ոչ: Նրան պարզաբանվել է, որ օտարերկրյա պետությունում գտնվելու դեպքում կորած անձնագրի փոխարեն նորը ստանալու համար քաղաքացին պետք է դիմի դիվանագիտական ծառայություն, իսկ առավել սեղմ ժամկետում լրացուցիչ գանձվող վճարի դիմաց անձնագիր տրամադրելու կարգը գործում է միայն Հայաստանի Հանրապետությունում:
Հայաստանի Հանրապետությունում գտնվող քաղաքացին ցանկանում էր տեղեկանալ, թե բնակության վայրը փոխելու դեպքում նոր բնակության վայրի հասցեով հաշվառվելու համար պե՞տք է արդյոք դիմել հին բնակության վայրի անձնագրային ծառայություն՝ հաշվառումից դուրս գրվելու համար: Պարզաբանվել է, որ գործընթացը պարզեցվել է և իրականացվում է մեկ պատուհանի սկզբունքով: Քաղաքացին կամ նրա լիազոր ներկայացուցիչը ներկայանում է նոր բնակության վայրի անձնագրային ծառայություն՝ ներկայացնելով օրենսդրությամբ սահմանված փաստաթղթերը: Դրանք պատշաճ լինելու դեպքում 3 աշխատանքային օրվա ընթացքում անձի հաշվառումը հանվում է նախկին բնակության վայրի հաշվառումից:
Հայաստանում գտնվող մեր մյուս հայրենակիցը ցանկանում էր տեղեկանալ, թե նույնականացման քարտ ստանալու համար պարտադի՞ր է դիմել հաշվառման վայրի անձնագրային ծառայություն: Նրան պարզաբանվել է, որ ի տարբերություն հին նմուշի անձնագրի՝ նշված փաստաթղթերը ստանալու համար քաղաքացին կարող է դիմել ցանկացած անձնագրային ծառայություն կամ անձնագրային և վիզաների վարչություն:
Օտարերկրյա պետությունում գտնվող քաղաքացին ցանկանում էր տեղեկանալ, թե ՀՀ նախագահի կողմից ՀՀ քաղաքացիություն շնորհելուց հետո անձը կարո՞ղ է առաջին անգամ անձնագիրը ստանալ դիվանագիտական ծառայության միջոցով, եթե գտնվում է օտարերկրյա պետությունում: Նրան պարզաբանվել է, որ ՀՀ քաղաքացիություն ստանալն ու ՀՀ քաղաքացու անձնագիր ստանալը առանձին գործընթացներ են: ՀՀ նախագահի կողմից ՀՀ քաղաքացիություն շնորհվելուց հետո նախ անհրաժեշտ է դիմել ՀՀ ոստիկանության անձնագրային և վիզաների վարչություն՝ անձնագիր ստանալու: Բացառություն է սահմանվել Լիբանանի, Սիրիայի և Իրաքի քաղաքացիների համար: Նրանք ՀՀ քաղաքացիություն ստանալուց հետո անձնագրերը կարող են ստանալ նշված պետություններում գտնվող ՀՀ դիվանագիտական ծառայություններից:
Սկայպի միջոցով հաջորդ ուղիղ կապը տեղի կունենա հունվարին:
ՀՀ ոստիկանության սկայպի հասցեն` Armenian Police
![](/images/skkkkk.jpg)
![](/images/Skype04.jpg.jpg)