Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)
![Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ) Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)](/timthumb?src=/resources/police/img/news/big/1448376876,9895.jpeg&q=75&w=780&wm=1)
Նոյեմբերի 24-ին մեր հայրենակիցները հերթական անգամ Skype-ի միջոցով իրենց հետաքրքրող հարցերն ուղղեցին ոստիկանության անձնագրային և վիզաների վարչության պետ Մնացական Բիչախչյանին:
Հայաստանից զանգահարած քաղաքացին հայտնել է, որ ցանկանում է փոխել ազգանունը, սակայն տեղյակ չէ, թե գործընթացը որ մարմնից պետք է սկսի: Նրան պարզաբանվել է, որ տվյալների փոփոխման հիմքով անձնագիրը փոխանակման ներկայացնելու համար նախ պետք է դիմել քաղաքացիական կացության ակտերի գրանցման մարմին՝ անվանափոխության խնդրանքով: Դիմումը բավարարվելուց հետո անհրաժեշտ է անվանափոխությունը հավաստող փաստաթղթերը ներկայացնել անձնագրային ծառայություն՝ անհատական տվյալների փոփոխության հիմքով նոր անձնագիր ստանալու համար:
Հայաստանից զանգահարած մեկ այլ քաղաքացի էլ հայտնել է, որ հաշվառված է Երևանում, սակայն ցանկանում է քվեարկությանը մասնակցել իր հաշվառման վայրից դուրս, քանի որ քվեարկության օրը գտնվելու է այնտեղ: Նրան պարզաբանվել է, որ ՀՀ ընտրական օրենսգրքի համաձայն՝ ըստ գտնվելու վայրի լրացուցիչ ցուցակներում կարող են ընդգրկվել այլ համայնքի հաշվառում ունեցողները: Հաշվի առնելով այն, որ ՀՀ Սահմանադրության համաձայն Երևանը մեկ համայնք է, ուստի Երևան քաղաքում հաշվառված անձինք չեն կարող ընդգրկվել ըստ գտնվելու վայրի քվեարկությանը մասնակցող անձանց լրացուցիչ ցուցակներում:
Դարձյալ Հայաստանից զանգահարած մեկ այլ քաղաքացի էլ տեղեկացրել է, որ հաշվառված է Մեղրի քաղաքում, սակայն ուսման նպատակով գտնվում է Երևանում: Ճանապարհի հեռավորության պատճառով չի կարող Սահմանադրության փոփոխությունների հանրաքվեին մասնակցելու համար գնալ Մեղրի, սակայն տեղեկացել է, որ գոյություն ունի քվեարկությանը մասնակցելու այլ ընթացակարգ, որի մանրամասներին չի տիրապետում: Նրան պարզաբանվել է, որ եթե Հայաստանի քաղաքացին քվեարկության օրը չի կարող գտնվել իր համայնքում, որտեղ հաշվառված է, ապա նա կարող է դիմում ներկայացնել հաշվառման կամ գտնվելու վայրի անձնագրային ծառայություն ըստ հաշվառման վայրի ընտրողների ցուցակից ժամանակավորապես դուրս գալու և ըստ գտնվելու վայրի ընտրողների լրացուցիչ ցուցակում ընդգրկվելու մասին` նշելով քվեարկության օրը գտնվելու վայրի հասցեն:
Անձնագրային ծառայությունը դիմումը ստանալուց հետո` եռօրյա ժամկետում, ընտրողին տրամադրում է տեղեկանք` ըստ հաշվառման վայրի ընտրողների ցուցակից նրա տվյալները հանելու և ըստ գտնվելու վայրի ընտրական տեղամասի ընտրողների լրացուցիչ ցուցակում ընդգրկելու վերաբերյալ:
Դիմում ներկայացնելու վերջնաժամկետը մինչև 2015 թվականի նոյեմբերի 29-ն է:
Հաջորդ ուղիղ կապը տեղի կունենա դեկտեմբերի 1-ին՝ Երեւանի ժամանակով ժամը 11-ից 13-ը:
ՀՀ ոստիկանության սկայպի հասցեն` Armenian Police
Հարցեր կարելի է ուղարկել նաև press@police.am, dimum@police.am էլեկտրոնային հասցեներին: