Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)
![Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ) Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)](/timthumb?src=/resources/police/img/news/big/1461680855,2744.jpeg&q=75&w=780&wm=1)
Ապրիլի 26-ին մեր հայրենակիցները Skype-ի միջոցով իրենց հետաքրքրող հարցերն ուղղեցին ոստիկանության անձնագրային և վիզաների վարչության պետ Մնացական Բիչախչյանին:
Հայաստանից զանգահարած կինը հայտնել է, որ ինքը Հայաստանի քաղաքացի է, իսկ ամուսինը՝ Ֆրանսիայի, իրենց երեխան ծնվել է Հայաստանում, 7 տարեկան է, ամուսնուց մի քանի տարի է տեղեկություններ չունի: Ցանկանում է երեխայի համար ստանալ Հայաստանի քաղաքացու անձնագիր, սակայն չի կարող ապահովել ամուսնու համաձայնությունը: Քաղաքացուհուն պարզաբանվել է, որ երբ ծնողներից մեկը երեխայի ծնվելու պահին Հայաստանի քաղաքացի է, իսկ մյուսը` այլ պետության, ապա երեխայի քաղաքացիությունը որոշվում է ծնողների գրավոր համաձայնությամբ: Սահմանված է նաև մեկ այլ նորմ. համաձայնության բացակայության դեպքում երեխան ձեռք է բերում Հայաստանի քաղաքացիություն՝ եթե նա ծնվել է Հայաստանում: Ուստի կինը, եթե չի կարող ապահովել ամուսնու համաձայնությունը, ապա երեխայի անձնագրի հարցով կարող է դիմել անձնագրային ծառայություն:
Օտարերկրյա պետությունից զանգահարած քաղաքացին տեղեկացրել է, որ 13 տարեկանում իր երեխան ստացել է Հայաստանի քաղաքացու անձնագիր, որը վավերական է մինչև 2016 թվականի հուլիսը: Ցանկանում են ամառային հանգիստն անցկացնել Հայաստանում, իսկ երեխայի 16 տարին լրանում է այս տարվա հոկտեմբերին: Քաղաքացին ցանկանում էր տեղեկանալ, թե հուլիսին երեխայի անձնագիր ստանալու համար դիմելիս նշված փաստաթուղթը քանի՞ տարով է տրվում և ով պետք է դիմի: Նրան պարզաբանվել է, որ անձնագիր տրվելու է մինչև 18 տարին լրանալու վավերականության ժամկետով: Եթե երեխայի 16 տարին դեռ լրացած չէ, ապա պետք է դիմի ծնողներից մեկը, իսկ 16 տարին լրացած լինելու դեպքում՝ երեխան:
Հաջորդ ուղիղ կապը տեղի կունենա մայիսի 3-ին՝ Երեւանի ժամանակով ժամը 11-ից 13-ը:
ՀՀ ոստիկանության սկայպի հասցեն` Armenian Police
Հարցեր կարելի է ուղարկել նաև press@police.am, dimum@police.am էլեկտրոնային հասցեներին: