Skype-ի միջոցով կայացավ հերթական ուղիղ կապը արտերկրի մեր հայրենակիցների հետ (ՏԵՍԱՆՅՈՒԹ)
![Skype-ի միջոցով կայացավ հերթական ուղիղ կապը արտերկրի մեր հայրենակիցների հետ (ՏԵՍԱՆՅՈՒԹ) Skype-ի միջոցով կայացավ հերթական ուղիղ կապը արտերկրի մեր հայրենակիցների հետ (ՏԵՍԱՆՅՈՒԹ)](/timthumb?src=/resources/police/img/news/big/1422964303,0707.jpeg&q=75&w=780&wm=1)
Փետրվարի 3-ին ոստիկանության անձնագրային և վիզաների վարչության պետի տեղակալ, ոստիկանության փոխգնդապետ Մնացական Բիչախչյանը սկայպի միջոցով հերթական անգամ պատասխանեց արտերկրի մեր հայրենակիցների հարցերին:
ՀՀ մի քաղաքացուհի հայտնում էր, որ ամուսինն օտարերյա պետության քաղաքացի է, ինքը երեխայի հետ գտնվում է Հայաստանում և ցանկանում է երեխայի համար ստանալ ՀՀ քաղաքացու անձնագիր: Կնոջը տեղեկացվել է, որ երբ ծնողներից մեկը երեխայի ծնվելու պահին Հայաստանի Հանրապետության քաղաքացի է, իսկ մյուսը` օտարերկրյա, ապա երեխայի քաղաքացիությունը որոշվում է ծնողների գրավոր համաձայնությամբ: Համաձայնության բացակայության դեպքում երեխան ձեռք է բերում Հայաստանի Հանրապետության քաղաքացիություն, եթե նա ծնվել է Հայաստանում:
Լիաբանանի Հանրապետությունից զանգահարած քաղաքացին տեղեկացնում էր, որ ծնվել է Սիրիայի Հանրապետությունում, ցանկանում է ստանալ ՀՀ քաղաքացիություն, սակայն ծննդյան վկայականից բացի չունի անձը հավաստող և որևէ երկրի քաղաքացիությունը ապացուցող փաստաթուղթ: Նրան պարզաբանվել է, որ եթե նա չի համարվում որևէ երկրի քաղաքացի, ապա հարցին լուծում տալու համար անհրաժեշտ է ներկայացնել կամ Սիրիայի կամ Լիբանանի քաղաքացիությունը հավաստող անձնագիր կամ քաղաքացիություն չունեցող անձի կոնվենցիոն փաստաթուղթ:
Օտարերկյա պետությունում բնակող մեր հայրենակիցը տեղեկացնում էր, որ ինքը փաստաթղթերով նախկին ՀԽՍՀ քաղաքացի է, 1989 թվականից չի բնակվում Հայաստանում և ցանկանում է իմանալ՝ համարվո՞ւմ է, արդյոք, ՀՀ քաղաքացի: Նրան պարզաբանվել է, որ ըստ գործող կարգի՝ եթե մինչև «Հայաստանի Հանրապետության քաղաքացիության մասին» ՀՀ օրենքի ուժի մեջ մտնելը, որը վավերացվել է 1995 թվականի նոյեմբերի 28-ին, ինքը ձեռք չի բերել այլ երկրի քաղաքացիություն, ապա օրենքի ուժով համարվում է ՀՀ քաղաքացի:
Սկայպի միջոցով հաջորդ ուղիղ կապը տեղի կունենա փետրվարի 10-ին:
ՀՀ ոստիկանության սկայպի հասցեն` Armenian Police