Արտերկրի մեր հայրենակիցների հարցերին Skype-ի միջոցով տրվեցին սպառիչ պատասխաններ (ՏԵՍԱՆՅՈՒԹ)
![Արտերկրի մեր հայրենակիցների հարցերին Skype-ի միջոցով տրվեցին սպառիչ պատասխաններ (ՏԵՍԱՆՅՈՒԹ) Արտերկրի մեր հայրենակիցների հարցերին Skype-ի միջոցով տրվեցին սպառիչ պատասխաններ (ՏԵՍԱՆՅՈՒԹ)](/timthumb?src=/resources/police/img/news/big/1415101201,1042.jpeg&q=75&w=780&wm=1)
Նոյեմբերի 4-ին ոստիկանության անձնագրային եւ վիզաների վարչության կազմակերպական-հսկողական բաժնի պետ, ոստիկանության փոխգնդապետ Մնացական Բիչախչյանը Skype-ի միջոցով հերթական անգամ պատասխանեց արտերկրի մեր հայրենակիցների հարցերին:
Մոսկվայում գտնվող մեր հայրենակիցը ցանկանում էր տեղեկանալ դեսպանատան միջոցով անձնագրի վավերականության ժամկետը երկարաձգելու, ինչպես և վավերականության նշում կատարելու կարգին, ինչը եւ պարզաբանվեց նրան:
Արտերկրում բնակվող մեր մեկ այլ հայրենակցի հարցը հետեւյալն էր. նա Հայաստանի Հանրապետության քաղաքացիություն ստանալու համար դիմել է դեսպանատուն, սակայն նրան մերժել են՝ պահանջելով զինվորական գրքույկ:
Մեր հայրենակցին պարզաբանվեց գործող կարգը: Միաժամանակ կապ հաստատվեց արտաքին գործերի նախարարության համապատասխան բաժնի պետի հետ, ով պատրաստակամություն հայտնեց օգնել քաղաքացուն՝ ծագած խնդիրները լուծելու հարցում:
Ռուսաստանի Դաշնությունում գտնվող մեր հայրենակցի հարցը թեեւ ոստիկանության իրավասություններից դուրս էր, այնուամենայնիվ, տրվեց իրավական իրազեկում: Խոսքը վերաբերում է միաժամանակ Ռուսաստանի Դաշնության եւ Հայաստանի Հանրապետության քաղաքացիություն ունեցող նրա երեխայի՝ հետագայում Հայաստանի զինված ուժերում ծառայելուն: Պարզաբանվեց, որ այլ պետության քաղաքացիություն ընդունած Հայաստանի Հանրապետության քաղաքացին չի ազատվում պարտադիր զինվորական ծառայությունից՝ անկախ այն հանգամանքից՝ ծառայե՞լ է այլ պետությունում, թե՝ ոչ:
Արտերկրի մեր հայրենակիցների հարցերը, ինչպես միշտ, բազմաբնույթ էին. դրանց տրվեցին սպառիչ պատասխաններ:
Սկայպի միջոցով հաջորդ ուղիղ կապը տեղի կունենա նոյեմբերի 11-ին՝ Երեւանի ժամանակով ժամը 10-ից 12-ը:
ՀՀ ոստիկանության սկայպի հասցեն` Armenian Police
Հարցեր կարելի է ուղարկել նաև press@police.am, qartugharutyun@police.am էլեկտրոնային հասցեներով: