Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)
![Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ) Ոստիկանությունում կայացավ Skype-ի միջոցով հերթական ուղիղ կապը մեր հայրենակիցների հետ (ՏԵՍԱՆՅՈՒԹ)](/timthumb?src=/resources/police/img/news/big/1441712858,0034.jpeg&q=75&w=780&wm=1)
Սեպտեմբերի 8-ին մեր հայրենակիցները հերթական անգամ Skype-ի միջոցով իրենց հետաքրքրող հարցերն ուղղեցին ոստիկանության անձնագրային և վիզաների վարչության պետի տեղակալ, ոստիկանության փոխգնդապետ Մնացական Բիչախչյանին: Զանգահարել է օտարերկրյա պետությունում գտնվող քաղաքացին և տեղեկացրել, որ ինքը և ամուսինը Հայաստանի քաղաքացիությունից բացի, ունեն նաև ՌԴ քաղաքացիություն: Երեխան ծնվել է Ռուսաստանում և ստացել այնտեղի քաղաքացիություն, իսկ Հայաստանում գտնվելու ժամանակ նրա համար ստացել են նաև Հայաստանի քաղաքացու անձնագիր: Զանգահարողը ցանկանում էր տեղեկանալ, թե տվյալ իրավիճակում երեխան համարվո՞ւմ է Հայաստանի քաղաքացի: Նրան պարզաբանվել է, որ երկքաղաքացին ՀՀ-ի համար ճանաչվում է միայն որպես Հայաստանի քաղաքացի: Հետևաբար՝ երեխան, ում ծնողները նրա ծնվելու պահին Հայաստանի քաղաքացիներ են, անկախ ծնվելու վայրից ձեռք է բերում Հայաստանի քաղաքացիություն: Զանգահարել է Հայաստանում գտնվող քաղաքացին և տեղեկացրել, որ եղբայրը ծնվել է 1988 թվականին, 1998 թվականից տեղափոխվել է բնակության Ռուսաստան, մինչ այժմ չի ստացել Հայաստանի քաղաքացու անձնագիր և չի ծառայել զինված ուժերում: Ծնողները մինչ Ռուսաստանի քաղաքացիություն ստանալը ունեցել են նաև Հայաստանի քաղաքացիություն: Զանգահարողը ցանկանում էր տեղեկանալ, թե եղբայրը հանդիսանո՞ւմ է Հայաստանի քաղաքացի, և եթե այո, ապա ի՞նչ կարգով կարող է ստանալ Հայաստանի քաղաքացու անձնագիր: Նրան պարզաբանվել է, որ ծնողների կողմից Հայաստանի քաղաքացիություն ձեռք բերելու հիմքով անձն արդեն իսկ ձեռք է բերել Հայաստանի քաղաքացիություն: Պարզաբանվել է նաև ՀՀ օրենսդրության մեկ այլ պահանջ, ըստ որի՝ Հայաստանի զինապարտ քաղաքացիները Հայաստանի քաղաքացու անձնագիր ստանալու համար պետք է ներկայացնեն զինվորական գրքույկ:
Հաջորդ ուղիղ կապը տեղի կունենա սեպտեմբերի 15-ին՝ Երեւանի ժամանակով ժամը 11-ից 13-ը:
ՀՀ ոստիկանության սկայպի հասցեն` Armenian Police Հարցեր կարելի է ուղարկել նաև press@police.am, qartugharutyun@police.am էլեկտրոնային հասցեներին: