Արտերկրի մեր հայրենակիցների հետ skype-ի միջոցով կայացավ հերթական ուղիղ կապը (ՏԵՍԱՆՅՈՒԹ)

Սեպտեմբերի 30-ը skype-ի միջոցով արտերկրի մեր հայրենակիցների հետ հերթական ուղիղ կապի օրն էր:

Ժամը 10-ից 12-ը նրանց հարցերին պատասխանեց ոստիկանության անձնագրային եւ վիզաների վարչության կազմակերպական-հսկողական բաժնի պետ Մնացական Բիչախչյանը: Նրան ուղղվեցին մեկ տասնյակից ավելի հարցեր:

Ռուսաստանի Դաշնությունում բնակվող մեր վեց հայրենակիցների հետաքրքրում էր ՌԴ իշխանություններին այլ պետության քաղաքացիություն ունենալու մասին տեղեկացնելու կարգը: Նրանց պարզաբանվեց, որ ՌԴ-ում ընդունվել է օրենք, որի համաձայն՝ այլ պետության քաղաքացիություն ունեցող անձինք պարտավոր են մինչեւ սույն թվականի հոկտեմբերի 4-ը համապատասխան միգրացիոն ծառայությանը գրավոր տեղեկացնել այդ մասին: Մեր հայրենակիցները թյուր կարծիքի էին, թե ՌԴ նոր օրենքով պարտադրվում է հրաժարվել այլ երկրի քաղաքացիությունից, մինչդեռ օրենքը նման պահանջ չի ներկայացնում, այն վերաբերում է միայն տեղեկացմանը:

1993 թվականից Իսրայելում բնակվող եւ Իսրայելի քաղաքացիություն ունեցող մեր հայրենակիցը ցանկանում էր ստանալ նաեւ Հայաստանի Հանրապետության քաղաքացիություն: Նրան հետաքրքրում էր ՀՀ քաղաքացիություն ստանալու կարգը, որը եւ պարզաբանվեց:

ՀՀ-ում կացության կարգավիճակ ստանալու կարգն էր հետաքրքրում Ռուսաստանում բնակվող մեր մեկ այլ հայրենակցի:

Հարցերը բազմաբնույթ էին. դրանց տրվեցին սպառիչ պատասխաններ:

Հաջորդ ուղիղ կապը տեղի կունենա հոկտեմբերի 7-ին, ժամը 10-ից 12-ը: 

 

Հիշեցնենք, որ արտերկրի մեր հայրենակիցների հետ սկայպի միջոցով ուղիղ կապը գործելու է ամեն երեքշաբթի՝ Երեւանի ժամանակով 10-ից 12-ը։

 

Ոստիկանության skype-ի հասցեն՝ Armenian Police

 

Հարցերը կարելի է ուղղել նաև press@police.am էլեկտրոնային հասցեին։

 

Ոստիկանության ներկայացուցիչները կպատասխանեն ՀՀ քաղաքացիություն ստանալու, քաղաքացիությունը դադարեցնելու, ՀՀ քաղաքացու անձնագիր և նույնականացման քարտ ստանալու, փոխանակելու, ըստ բնակության վայրի հաշվառվելու, կացության կարգավիճակ ստանալու, ինչպես նաև անձնագրային և վիզաների վարչության գործառույթներին առնչվող այլ հարցերի: