Ոստիկանները բացահայտել են արտադրամասի պահակի սպանության դեպքը
![Ոստիկանները բացահայտել են արտադրամասի պահակի սպանության դեպքը Ոստիկանները բացահայտել են արտադրամասի պահակի սպանության դեպքը](/timthumb?src=/resources/police/img/news/big/1596549620-6142.jpeg&q=75&w=780&wm=1)
Օգոստոսի 3-ին, ժամը 23.05-ին, Վանաձորի շտապօգնության կայանից ոստիկանության Գուգարքի բաժնում հաղորդում էր ստացվել, որ Դարպաս գյուղի Գործարանային փողոցում գտնվող արտադրամասի տարածքում մահացել է 68-ամյա պահակը։
Դեպքի վայր մեկնած օպերատիվ խմբի ծառայողները պարզել են, որ ժամը 20.40-ի սահմաններում տղամարդու դին հայտնաբերել է նրա կինը։
Դիակի արտաքին զննությամբ գլխի շրջանում վնասվածք էր հայտնաբերվել։
Դեպքի առթիվ հարուցվել է քրեական գործ` ՀՀ քրեական օրենսգրքի 104-րդ հոդվածի (Սպանությունը) 1-ին մասի հատկանիշներով:
Ձեռնարկված օպերատիվ հետախուզական միջոցառումների արդյունքում ոստիկանության ծառայողները ճշտել են կասկածյալի ինքնությունը և տարված բացատրական աշխատանքի արդյունքում, ժամը 12.45-ին Վանաձոր քաղաքի 38-ամյա բնակիչը ներկայացել է ոստիկանության Գուգարքի բաժին։ Նա հայտնել է, որ ինքն է մետաղյա ձողով երկու անգամ խփել պահակի գլխին:
Դեպքի վայրի զննությամբ հանցագործության գործիքը հայտնաբերվել և վերցվել է:
Տղամարդը ներկայացվել է նախաքննությունն իրականացնող մարմնին։
Քննությունը շարունակվում է։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: