Ոստիկանության ծառայողները բացահայտել են թմրամիջոցների իրացման դեպքեր․ մի խումբ անձինք ձերբակալվել են

Ծավալուն օպերատիվ-հետախուզական միջոցառումների արդյունքում ՔՈԳՎ թմրամիջոցների անօրինական շրջանառության դեմ պայքարի վարչության ծառայողները տվյալներ ձեռք բերեցին, որ Երևանում բնակվող 34 և 35 տարեկան երկու տղամարդ զբաղվում են տարբեր տեսակի թմրամիջոցների իրացմամբ։ Դեկտեմբերի 7-ին գլխավոր վարչության ծառայողները, համագործակցելով ոստիկանության Երևան քաղաքի վարչության քրեական հետախուզության բաժնի, Կենտրոնական բաժնի և ՃՈ ուղեկցող հատուկ վաշտի ծառայողների հետ, մայրաքաղաքի տարբեր թաղամասերում նախ հայտնաբերեցին ու կասկածանքով բերման ենթարկեցին վերը նշված տղամարդկանցից թմրամիջոց ձեռք բերած անձանց։ Նրանց խուզարկությամբ հայտնաբերվեց տարբեր քաշերով մեթամֆետամին։ Բերման ենթարկվածներից ոմանք ձերբակալվեցին։  Նույն օրը գիշերը հայտնաբերվեցին ու բերման ենթարկվեցին 34 և 35 տարեկան տղամարդիկ։ Նրանցից մեկի խուզարկությամբ հայտնաբերվեց հերոին, մյուսի խուզարկությամբ՝ մեթամֆետամին։ Հարուցված քրեական գործի շրջանակներում դեկտեմբերի 10-ին խուզարկություն կատարվեց 34-ամյա տղամարդու վարձակալած բնակարանում: Հայտնաբերվեցին տարբեր քաշերով հաշիշ, մեթամֆետամին, մարիխուանա, գազային ատրճանակ և այլն։ Նշանակվել են փորձաքննություններ։ 34 և 35 տարեկան տղամարդիկ ձերբակալվել են։ Նախաքննությունը շարունակվում է։