Ալավերդու ոստիկանները բնակարանային գողության դեպքեր են բացահայտել

Նախորդ տարվա նոյեմբերի 29-ին Ախթալա քաղաքի Րաֆֆու փողոցի տներից մեկում գողություն էր կատարվել: Ոստիկանության Թումանյանի բաժնի ծառայողները մեկնել էին դեպքի վայր, ուսումնասիրել տան տարածքը, կազմել համապատասխան արձանագրություններ: Հարուցվել էր քրեական գործ: Սակայն ո՛չ այդ, ո՛չ էլ հաջորդ օրերին բնակարանային գողությունը բացահայտել չհաջողվեց: Քրեական հետախույզները շարունակեցին գողությունը կատարած անձի ինքնությունը պարզելու և գողոնը հայտնաբերելու ուղղությամբ միջոցառումները, և հետևողական աշխատանքը ամիսներ անց դրական արդյունք տվեց: Մարտի 4-ին տեղեկություններ ստացվեցին, որ գողությունը հնարավոր է կատարած լինի Րաֆֆու փողոցի 48-ամյա մի բնակիչ: Նույն օրը կասկածվողը բերման ենթարկվեց ոստիկանության Թումանյանի բաժին:Հետագա միջոցառումներով պարզվել է, որ 48-ամյա տղամարդը փետրվարի 10-ին և մարտի 2-ին նույն փողոցի մեկ այլ տնից գողացել է շինարարական ու փայտամշակման գործիքներ, խմիչք, կենցաղային իրեր և վրան: Գողոնը մասամբ հայտնաբերվել է: Հանգամանքները պարզվում են: Հարուցված քրեական գործի նախաքննությունը շարունակվում է: