Ընդունելություն ՀՀ ոստիկանությունում (ՏԵՍԱՆՅՈՒԹ)

Ապրիլի 28-ին ոստիկանության պետի առաջին տեղակալ, ոստիկանության գեներալ-լեյտենանտ Հունան Պողոսյանն ընդունեց Ռուսաստանի Դաշնության ներքին գործերի նախարարության օպերատիվ-հետախուզական տեղեկատվության վարչության պետ, ոստիկանության գեներալ-մայոր Վիտալի Շուլիկայի գլխավորած պատվիրակությունը:
Պատվիրակությունը Հայաստանում է հուլիսին կայանալիք Ռուսաստանի Դաշնության ներքին գործերի նախարարության եւ Հայաստանի Հանրապետության ոստիկանության միավորված կոլեգիայի նիստի օրակարգի հարցերի նախապատրաստման նպատակով:
Հունան Պողոսյանը բարձր գնահատեց հայ-ռուսական գործընկերային հարաբերությունները՝ նշելով, որ համագործակցությունն արդեն իսկ վերածվել է համատեղ աշխատանքի:
Հանդիպման մասնակիցները հստակեցրին այն հիմնական ուղղությունները, որոնցով ակնկալվում է առավել սերտ փոխգործակցություն: Կարեւորվեց, մասնավորապես, մարդկանց թրաֆիքինգի, թմրամիջոցների անօրինական շրջանառության, կիբերհանցավորության եւ անօրինական միգրացիայի դեմ պայքարի ոլորտներում փոխգործակցության արդյունավետության հետագա բարձրացումը:
Քննարկվեցին նաեւ փոխադարձ հետաքրքրություն ներկայացնող այլ հարցեր: