Երևանի 36-ամյա բնակչի մեքենայում ատրճանակ է հայտնաբերվել. նախաձեռնվել է քրեական վարույթ
Համայնքային ոստիկանության Վաղարշապատի բաժնի ծառայողները օպերատիվ տեղեկություն էին ստացել, որ Երևան քաղաքի 36-ամյա բնակիչը իր «Մերսեդես» մակնիշի մեքենայում ապօրինի պահում է զենք-զինամթերք:
Արմավիրի մարզի պարեկային ծառայության հետ համատեղ ձեռնարկած օպերատիվ-հետախուզական միջոցառումների արդյունքում մարտի 13-ի գիշերը՝ ժամը 3.15-ի սահմաններում, մայրաքաղաքի Իսակովի պողոտայում կանգնեցվել է 36-ամյա տղամարդու «Մերսեդեսը», որը վարում էր նրա ընկերը՝ Արմավիրի մարզի Արևաշատ գյուղի 39-ամյա բնակիչը: Մեքենան տեղափոխվել է Համայնքային ոստիկանության Վաղարշապատի բաժին: Թաիրով բնակավայրում հայտնաբերվել, զենք-զինամթերք պահելու կասկածանքով ձերբակալվել և բաժին է տեղափոխվել նաև Երևանի բնակիչ 36-ամյա երիտասարդը: Նա և կազմված փաստաթղթերը ներկայացվել են Վաղարշապատի քննչական բաժին:
Նախաձեռնվել է քրեական վարույթ, որի շրջանակում կատարված զննությամբ պահպանվող հատուկ տարածք տեղափոխված «Մերսեդեսի» սրահի պահախցում հայտնաբերվել է 9 մմ տրամաչափի ատրճանակ։
36-ամյա երիտասարդը տեղափոխվել է ձերբակալվածների պահման վայր:
Կատարվում է նախաքննություն:
ՆԳՆ ոստիկանությունը հորդորում է քրեական պատասխանատվությունից խուսափելու համար կամավոր հանձնել ապօրինի պահվող զենք-զինամթերքը։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
