Ինքնաձիգ, ատրճանակներ, հրացաններ․ ոստիկանության բաժիններում ապօրինի զենքեր են հանձնվել
Ոստիկանության Թումանյանի բաժնի ծառայողների բացատրական աշխատանքի արդյունքում Ալավերդիում բնակվող 66-ամյա մի տղամարդ կամավոր հանձնել է գործարանային համարը ջնջված «Կալաշնիկով» ինքնաձիգ՝ պահունակով։ Տղամարդու հայտնածով՝ հրազենը գտել է։
Ոստիկանության Արագածի բաժնի ծառայողների բացատրական աշխատանքի արդյունքում Ծաղկահովիտ գյուղում բնակվող 61-ամյա մի տղամարդ կամավոր հանձնել է առանց գործարանային համարի ատրճանակ, ինքնաշեն կրակող սարք և ինքնաձիգի 140-ից ավելի փամփուշտ՝ հայտնելով, որ դրանք ձեռք է բերել տարիներ առաջ։
Վաղարշապատի բաժնի համայնքային ոստիկանների բացատրական աշխատանքի արդյունքում բաժնում արձանագրվել է ապօրինի պահվող զենք-զինամթերքի կամավոր հանձնման երկու դեպք։ Էջմիածնի 68-ամյա բնակիչներից մեկը կամավոր հանձնել է մասնատված հրացան, նռնակ, նռնակի պայթուցիչ, ինքնաձիգի փամփշտատուփ և տարբեր տրամաչափի փամփուշտներ։ Էջմիածնի մեկ այլ բնակիչ էլ կամավոր հանձել է ինքնաշեն ատրճանակ, նռնակ, նռնակի պայթուցիչ, ինքնաձիգի փամփշտատուփ և տարբեր տրամաչափի փամփուշտներ։
Ոստիկանության Ստեփանավանի բաժնի ծառայողների բացատրական աշխատանքի արդյունքում Լոռու մարզում բնակվող մի տղամարդ բաժնում կամավոր հանձնել է գործարանային համարով հրացան ու տարբեր տրամաչափի փամփուշտներ։
Նշանակվել են դատաձգաբանական փորձաքննություններ։
Հիշեցնենք, որ ապօրինի պահվող զենք-զինամթերքը կամավոր հանձնողներն ազատվում են քրեական պատասխանատվությունից։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
