ՀՀ ՆԳՆ ոստիկանության թեժ գիծ
  • Ընդհանուր հարցերով
    (+374) 10 54-69-14
    (+374) 10 54-69-12
    Աշխ. ժամեր՝ 9-ից 18-ը: Ընդմիջում՝ 13-ից 14-ը:
    Հանգստյան օրեր՝ շաբաթ, կիրակի:

Ավազակություն Վաղաշեն գյուղում. հանցագործությունը բացահայտվել է

06.07.2021 12:31 Ավազակություն
Ավազակություն Վաղաշեն գյուղում. հանցագործությունը բացահայտվել է

Հուլիսի 5-ին, ժամը 12.15-ին, շտապօգնության կայանից ոստիկանության Մարտունու բաժին հաղորդում էր ստացվել, որ Վաղաշեն գյուղում հարձակվել են նույն գյուղի 90-ամյա բնակչուհու վրա, պոկել ականջօղերը, ինչի հետևանքով պատռվել են ականջների բլթակները:
Ձեռնարկված օպերատիվ-հետախուզական և քննչական միջոցառումների շնորհիվ պարզվել է, որ ժամը 12.00-ի սահմաններում Վաղաշեն գյուղի 44-ամյա բնակիչը, գլխարկը գլխին քաշած, դանակը ձեռքին, մտել է թոշակառու կնոջ տուն, քաշելով հանել է տնից, ձեռքերով հարվածներ հասցնելով՝ փորձել է խեղդել նրան, ապա քաշել պոկել է ոսկյա ականջօղերը, պարանոցի ոսկյա կախազարդը և դանակով վնասելով նախաբազուկը՝ դիմել է փախուստի:
Ոստիկանության Գեղարքունիքի մարզային վարչության և Մարտունու բաժնի ծառայողների համատեղ ձեռնարկած միջոցառումների շնորհիվ կասկածյալը Վաղաշեն գյուղում հայտնաբերվել և բերման է ենթարկվել Մարտունու բաժին: Նրա անձնական խուզարկությամբ տաբատի գրպանից հայտնաբերվել է հանցագործության գործիք խոհանոցային դանակը և բժշկական դիմակ: Դեպքի վայրի զննությամբ հայտնաբերվել է պարանոցի կախազարդը և մեկ ականջօղը:
Դեպքի առթիվ ՀՀ քրեական օրենսգրքի 175-րդ հոդվածի 2-րդ մասի 4-րդ կետով հարուցվել է քրեական գործ: 44-ամյա տղամարդը ձերբակալվել է: Նշանակվել է դատաբժշկական փորձաքննություն:
Կատարվում է նախաքննություն:

`


Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: