Վաղարշապատի ոստիկանները բացահայտեցին հեծանվի գողությունը

Հունիսի 7-ի կեսօրին Էջմիածին քաղաքի Զվարթնոց թաղամասի մի բնակիչ ոստիկանության Վաղարշապատի բաժնում տվել է հաղորդում, որ իրենց մուտքի չորրորդ հարկի աստիճանավանդակից գողացել են իր հեծանիվը: Տիրոջը պատճառվել էր 180 հազար դրամի վնաս:
Բաժնի համայնքային ոստիկանները, համագործակցելով քրեական հետախույզների հետ, ձեռնարկեցին միջոցներ, և պարզվեց, որ հեծանիվը գողացել է Ծաղկունք գյուղի բնակիչ 30-ամյա մի տղամարդ:
Բացատրական աշխատանքի արդյունքում հունիսի 9-ի առավոտյան տղամարդը ներկայացել է ոստիկանության բաժին և խոստովանել արարքը:
Կազմված փաստաթղթերը ներկայացվել են Վաղարշապատի քննչական բաժին: Ձեռնարկվում են միջոցառումներ՝ գողոնը հայտնաբերելու ուղղությամբ: