Պարգևատրման արարողություն «Դինամոյում» (ՏԵՍԱՆՅՈՒԹ)

Փետրվարի 23-ին Հայաստանի «Դինամո» մարզական հասարակական կազմակերպությունում տեղի ունեցավ 2015 թվականին մարտական և ֆիզիկական պատրաստականությունից, ինչպես և սպորտային միջոցառումներից բարձր ցուցանիշներ գրանցած ստորաբաժանումների և ոստիկանության ծառայողների պարգևատրումը։
Հայաստանի «Դինամո» մարզական հասարակական կազմակերպության նախագահի 1-ին տեղակալ, ոստիկանության մարտական և ֆիզիկական պատրաստականության բաժնի պետ, ոստիկանության գնդապետ Գառնիկ Հայրապետյանը հանձնելով պարգևները՝ շնորհակալություն հայտնեց սպորտի նկատմամբ ցուցաբերած ուշադրության համար և վստահեցրեց, որ «Դինամոյի» դռները միշտ բաց են ոստիկանների առաջ և մարզօջախն այսուհետ էլ լինելու է ոստիկանության մարտական և ֆիզիկական պատրաստականության հուսալի գրավականը:
Գավաթներով և պատվոգրերով պարգևատրվեցին ոստիկանության կենտրոնական ապարատի մի շարք ստորաբաժանումներ, Երևան քաղաքի վարչությունը՝ ենթակա ստորաբաժանումներով, պետական պահպանության գլխավոր վարչությունը և ոստիկանության զորքերը։
Մարտական և ֆիզիկական պատրաստականությունից բարձր ցուցանիշների ու սպորտային միջոցառումներին ակտիվ մասնակցություն համար պատվոգրի և գավաթի արժանացավ նաև ոստիկանության հասարակայնության հետ կապի և լրատվության վարչությունը:
Ֆիզիկական պատրաստականությունից գերազանց արդյունքներ ցուցաբերած ոստիկանության մի շարք ծառայողներ պարգևատրվեցին Հայաստանի «Դինամո» մարզական հասարակական կազմակերպության 90-ամյակի հուշամեդալներով և պատվոգրերով։