Ընդունելություն ՀՀ ոստիկանությունում (ՏԵՍԱՆՅՈՒԹ)
![Ընդունելություն ՀՀ ոստիկանությունում (ՏԵՍԱՆՅՈՒԹ) Ընդունելություն ՀՀ ոստիկանությունում (ՏԵՍԱՆՅՈՒԹ)](/timthumb?src=/resources/police/img/news/big/1432304683,3065.jpeg&q=75&w=780&wm=1)
Մայիսի 22-ին ոստիկանության շտաբի պետ, ոստիկանության գեներալ-մայոր Արամ Զաքարյանն ընդունեց ԱՄՆ Պետքարտուղարության Թմրամիջոցների դեմ պայքարի և իրավապահ մարմինների հետ համագործակցության բյուրոյի Վաշինգտոնյան գրասենյակի Եվրոպայի/Եվրասիայի/Կենտրոնական Ասիայի ծրագրերի ղեկավար Ջուդիթ Քեմբելի գլխավորած պատվիրակությանը:
Ողջունելով հյուրերին՝ Արամ Զաքարյանն առանձնակի կարևորեց Հայաստանի Հանրապետության ոստիկանության և Հայաստանում ԱՄՆ դեսպանության միջև շարունակվող համագործակցությունը, որն արդեն շոշափելի արդյունքներ է տվել, մասնավորապես, անդրազգային հանցավորության դեմ պայքարում, և հատկապես՝ թրաֆիքինգի, թմրամիջոցների ապօրինի շրջանառության ոլորտներում, ինչպես և հասարակական կարգի պահպանման նոր` «Հրեշտակներ» ստորաբաժանման արդյունավետ աշխատանքի և համայնքային ոստիկանության մոդելի ներդրման գործում:
Տիկին Քեմբելին, մասնավորապես, հետաքրքրում էին Հայաստանի ոստիկանությունում ընթացող բարեփոխումները:
Արամ Զաքարյանը նշեց, որ ներկայումս ոստիկանությունը մտնում է բարեփոխումների նոր փուլ: Մշակվում է ոստիկանության գործունեության ոլորտում 2015-2017 թվականների բարեփոխումների նոր ծրագիրը, որը շուտով կհաստատվի:
Ոստիկանության հանդեպ հանրային վերաբերմունքի դրական փոփոխությունն էական ու նկատելի է, առկա է վստահության որոշակի աճ, ինչը վկայում է, որ համակարգի բարեփոխման ռազմավարությունը ճիշտ ուղու վրա է:
Այցի շրջանակներում հանդիպում տեղի ունեցավ նաև կազմակերպված հանցավորության դեմ պայքարի գլխավոր վարչությունում, որտեղ ներկայացվեցին թրաֆիքինգի, անօրինական միգրացիայի, կիբերհանցագործությունների ոլորտներում Թմրամիջոցների դեմ պայքարի և իրավապահ համագործակցության ծրագրերի շրջանակներում կատարված աշխատանքները, ինչպես և քննարկվեցին հետագա փոխհամագործակցությանն առնչվող հարցեր: