Համայնքային ոստիկանները թմրամիջոցի շրջանառության դեպք են բացահայտել
![Համայնքային ոստիկանները թմրամիջոցի շրջանառության դեպք են բացահայտել Համայնքային ոստիկանները թմրամիջոցի շրջանառության դեպք են բացահայտել](/timthumb?src=/resources/police/img/news/big/1714984960-105.jpeg&q=75&w=780&wm=1)
Ոստիկանության Մասիսի բաժնի համայնքային ոստիկանները տեղեկություններ էին ստացել, որ Նոր Խարբերդ գյուղի մի բնակիչ մոտը թմրանյութ է պահում: Ձեռնարկված միջոցառումների արդյունքում 20-ամյա երիտասարդը գյուղի 21-րդ փողոցի սկզբնամասում հայտնաբերվել, թմրանյութ ձեռք բերելու և պահելու հիմնավոր կասկածի առկայությամբ ձերբակալվել և տեղափոխվել է Մասիսի բաժին: Անձնական խուզարկությամբ նրա մոտ հայտնաբերված ծխախոտի տուփի մեջ կար մոխրացած հետքերով կաթուցիչ և դեղնաշագանակագույն, սուր հոտով 1 գրամ զանգված: Ըստ երիտասարդի՝ այն շոկո տեսակի թմրամիջոց է, ձեռք է բերել Նոր Խարբերդի 30-ամյա բնակչից: Պարզվել է նաև, որ նա նշված թմրամիջոցից հյուրասիրել էր Նոր Խարբերդի 47-ամյա բնակչին:
20-ամյա երիտասարդը, հայտնաբերված զանգվածը և կազմված փաստաթղթերը ներկայացվել են Մասիսի քննչական բաժին։ Նախաձեռնվել է քրեական վարույթ:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: