Գյումրեցի տղամարդկանց մոտ կրիստալ և մարիխուանա հայտնաբերվեց. Ախուրյանի համայնքային ոստիկանների բացահայտումը

Ոստիկանության Ախուրյանի բաժնի համայնքային ոստիկանները, իրացնելով օպերատիվ տեղեկությունները, հունվարի 10-ին Ազատան բնակավայրի վարչական տարածքի ռեստորանային համալիրներից մեկի հարակից դաշտում հայտնաբերել, թմրանյութ պահելու և օգտագործելու կասկածանքով ձերբակալել և բաժին են տարել գյումրեցի 29 և 41 տարեկան երկու տղամարդու: Բաժնում 41-ամյա տղամարդու խուզարկությամբ հայտնաբերվեցին ծխախոտի տուփեր՝ ընդհանուր 1,64 գրամ մարիխուանայի զանգվածներով, թմրամիջոցի նմանվող զանգվածով կաթուցիչ, կրիստալ տեսակի թմրանյութ օգտագործելու համար նախատեսված գլանակ, 0,05 գրամ կրիստալ տեսակի թմրանյութ, 3 ծխագլանակ՝ թութունի և կրիստալի ընդհանուր 2,89 գրամ միախառնուրդ զանգվածով:
29-ամյա տղամարդու խուզարկությամբ հայտնաբերվեցին 0,31 գրամ կրիստալ տեսակի թմրանյութ և թմրանյութով լցված կիսածխած գլանակ:
41-ամյա տղամարդը հայտնեց, որ թմրամիջոցները ձեռք էր բերել Տելեգրամ հավելվածի միջոցով:
29-ամյա և 41-ամյա տղամարդիկ կազմված փաստաթղթերի հետ ներկայացվել են Ախուրյանի քննչական բաժին: