Ոստիկանության զորքերի նոր վարչական շենքի հանդիսավոր բացումը Դավթաշեն համայնքում (ՏԵՍԱՆՅՈՒԹ և ԼՈՒՍԱՆԿԱՐՆԵՐ)

Հունիսի 21-ը ոստիկանության զորքերի կազմավորման 22-րդ տարեդարձի օրն է:
Ստեղծման օրից երկու ճակատով գործող այս կառույցը միշտ պատվով է կատարել իր առջև դրված խնդիրները, մեծապես նպաստել մեր նորաստեղծ պետականության ամենամեծ ձեռքբերումներին` արժանապատիվ խաղաղությանն ու ներքին կայունությանը:
Ոստիկանության զորքերի այսօրվա պատմության կերտողները հոբելյանը նշանավորեցին նոր վարչական շենքի բացումով:
Ոստիկանության զորքերի նոր վարչական շենքի բացման արարողությանը ներկա էր Հայաստանի Հանրապետության նախագահ Սերժ Սարգսյանը:
Ոստիկանության զորքերի տեխնիկայի ու հատուկ միջոցների նմուշները դիտելուց հետո զինծառայողները ցուցադրական վարժանքի ընթացքում ներկայացրին իրենց մարտական հմտությունները: 
Այնուհետև ոստիկանության պետ Վադիմիր Գասպարյանի և ոստիկանության զորքերի հրամանատար Լևոն Երանոսյանի ուղեկցությամբ հանրապետության նախագահը շրջեց հիմնանորոգված շենքում, ծանոթացավ իրականացված աշխատանքներին, ստեղծված աշխատանքային պայմաններին:
Վարչական շենքն ունի ժամանակակից, կահավորված աշխատասենյակներ, դահլիճ, ուսումնական և ցուցադրական սրահներ, որոնք հագեցած են նոր սերնդի տեխնիկայով, ծառայության պայմանները դյուրին դարձնելու և աշխատանքը ժամանակի պահանջներին համահունչ կազմակերպելու անհրաժեշտ միջոցներով:
Նախագահ Սերժ Սարգսյանը ոստիկանության զորքերի կազմավորման 22-րդ տարեդարձի առթիվ շնորհավորեց և արդյունավետ ծառայություն մաղթեց ոստիկանության զորքերի հրամանատարությանն ու ողջ անձնակազմին:
Ոստիկանության զորքերի նոր վարչական շենքի բացման արարողությունը լուսաբանող լրագրողների հարցերին պատասխանեց ոստիկանության պետ Վլադիմիր Գասպարյանը: