Ոստիկանության հերթապահ մասի ծառայողների հերթական սեմինար-պարապմունքը

Նոյեմբերի 27-ին տեղի ունեցավ ոստիկանության հերթապահ մասի ծառայողների հերթական սեմինար-պարապմունքը, որը վարում էր ոստիկանության շտաբի պետ, ոստիկանության գեներալ-մայոր Վարդան Եղիազարյանը:

Սեմինար-պարապմունքին մասնակցում էին ոստիկանության Երևանի և մարզային վարչությունների շտաբների պետերը, հերթապահ մասերի պետերը, այն աշխատակիցները, որոնք ծառայության բերումով չէին մասնակցել նախորդ սեմինարին:

Վարդան Եղիազարյանը նշեց, որ ոստիկանությունում ընթացող բարեփոխումներն արդեն իսկ զգալի արդյունքներ են արձանագրել, և գործընթացն աստիճանաբար ընդգրկում է համակարգի բոլոր օղակները՝ հեռանկարում ունենալով ոստիկանական ողջ կառույցն արդիականացնելու խնդիր:

Կարևորելով հերթապահ մասերի աշխատանքը՝ Վարդան Եղիազարյանը նշեց, որ բարեփոխումներն այդ օղակում առաջնահերթություն են, և դրան են ուղղված նաև սեմինարի մասնակիցներին ներկայացվող ուղեցույց-ձեռնարկները, որոնք ընդգրկում են հերթապահ մասի աշխատանքի ողջ շրջանակը, ինչպես և հագեցված են խտասկավառակով, ինչը հնարավորություն է տալիս էլեկտրոնային տարբերակով աշխատել նաև համացանցում:

Վարդան Եղիազարյանը նշեց, որ օրակարգում են ծառայության կառուցվածքային և կազմակերպչական բարեփոխումները, սակայն կան մի շարք խնդիրներ, որոնք լուծում պետք է ստանան այսօր իսկ: Մասնավորապես՝ խոսքը վերաբերում է աշխատանքային ու կատարողական կարգապահության ամրապնդմանը, մարզային ստորաբաժանումների հետ տարվող մեթոդական աշխատանքի խորացմանը, կադրերի ճիշտ ընտրությանը, գործնական պարապմունքների միջոցով հերթապահ մասերի ծառայողների մասնագիտական և անձնային որակների բարձրացմանը, քաղաքացիների հետ աշխատանքի արմատական վերափոխմանը և այլն:

Սեմինարն անցավ մասնակիցների միջև առարկայական հարցուպատասխանի, հերթապահ մասի հիմնախնդիրների գործնական քննարկման աշխատակարգով:

Ամփոփելով սեմինար-պարապմունքը՝ Վարդան Եղիազարյանը մասնակիցներին կրկին հիշեցրեց հերթապահ մասի և իրենց ծառայության նշանակությունը օրինապահության և ոստիկանության հանդեպ հասարակության հավատի ամրապնդման գործում: