Վանատուրում բնակարանային գողություն արած անձը ձերբակալվել է․Հրազդանի ոստիկանների բացահայտումը

Մարտի 7-ի երեկոյան ոստիկանության Հրազդանի բաժնում բնակարանային գողության վերաբերյալ հաղորդում ստացվեց։  Ոստիկանություն դիմած տղամարդը հայտնում էր, որ իրեն վստահված բնակարանից գողություն է արվել։  Վանատուր թաղամասում գտնվող տունը, որ հաղորդում տվողի ազգականներինն էր, չէր բնակեցվում։ Տանտերերն արտերկրում են։ Հանգամանք, որը գրավել էր գողություն արած անձի ուշադրությունը։ Դեպքի վայր մեկնած օպերատիվ-քննչական  խմբերը պարզեցին, որ տուն էին մտել պատուհանով ու գողացել կենցաղային տեխնիկա և իրեր։ Հարուցվեց քրեական գործ, որի շրջանակներում ձեռնարկվեցին օպերատիվ-հետախուզական միջոցառումներ ու քննչական գործողություններ։ Հետևողական աշխատանքի արդյունքում Հրազդանի ոստիկաններին հաջողվեց փաստական տվյալներ ձեռք բերել հանցագործությունը կատարելու մեջ կասկածվող անձի ինքնության վերաբերյալ։ Նույն օպերատիվությամբ էլ Վանատուր թաղամասում բնակվող 56-ամյա տղամարդը հայտնաբերվեց ու բերման ենթարկվեց բաժին, որտեղ խոստովանեց արարքը։ Հետագա միջոցառումներով հայտնաբերվեց նաև գողոնի մի մասը։ Բերման ենթարկվածը ձերբակալվել է։ Հարուցված քրեական գործի նախաքննությունը շարունակվում է։